रिओतील उत्तेजक प्रतिबंधक प्रयोगशाळेवरील बंदी अखेर उठवली

रिओ येथील उत्तेजक प्रतिबंधक प्रयोगशाळा लवकरच पुन्हा सुरू होणार आहे. जागतिक उत्तेजक प्रतिबंधक समितीने (वाडा) त्यांच्यावरील बंदीचा निर्णय मागे घेतला. उत्तेजक प्रतिबंधक प्रयोगशाळांकरिता असलेल्या आंतरराष्ट्रीय नियमानुसार ही प्रयोगशाळा नसल्यामुळे २२ जून रोजी ‘वाडा’ने त्यावर बंदी घातली होती. ही प्रयोगशाळा आंतरराष्ट्रीय दर्जाची राहील, असे आश्वासन येथील क्रीडा मंत्रालय व ब्राझील उत्तेजक प्रतिबंधक

समितीने दिल्यानंतर ‘वाडा’ने बंदी स्थगित केली व प्रयोगशाळा सुरू करण्यास परवानगी दिली.

ब्राझील क्रीडा मंत्रालयाने पत्रकात म्हटले आहे, ‘५ ऑगस्टपासून ऑलिम्पिक क्रीडा स्पर्धा सुरू होत असल्यामुळे आमच्या दृष्टीने प्रयोगशाळा महत्त्वपूर्ण असणार आहे. तेथे आंतरराष्ट्रीय दर्जा राहील अशी आम्ही वाडा संस्थेला खात्री दिली आहे. ऑलिम्पिक क्रीडा स्पर्धा व त्यानंतर होणाऱ्या पारा ऑलिम्पिक स्पर्धाच्या वेळी उत्तेजक चाचणी घेतली जाण्याची आम्ही सर्व तयारी केली आहे.’

‘वाडा’चे सरसंचालक ऑलिव्हर निगेली यांनी सांगितले, ‘रिओ येथील प्रयोगशाळेत रक्त व लघवीच्या तपासणीला या आठवडय़ाच्या अखेरीस सुरुवात करण्याची आम्ही मान्यता दिली आहे. या प्रयोगशाळेत उत्तेजक चाचणी अव्वल रीतीने होईल, असे आश्वासन आम्हाला ब्राझीलच्या संघटकांनी दिल्यानंतरच आम्ही परवानगी दिली.

ऑलिम्पिक क्रीडा स्पर्धेच्या कालावधीत सात हजारहून अधिक खेळाडूंची उत्तेजक चाचणी घेतली जाणार आहे. वाडा संस्थेने जूनमध्ये येथील प्रयोगशाळेवर बंदी घातल्यानंतर तेथील प्रमुख माकरे ऑरेली क्लेन यांची हकालपट्टी करण्यात आली व त्यांच्या जागी ब्राझीलचे माजी ऑलिम्पिक सुवर्णपदक विजेते ज्यूदोपटू राजिरिओ साम्पोईओ यांची नियुक्ती करण्यात आली.